(本報訊)雨僑與老公羅力威婚後感情更勝從前,狂讚老公是細心暖男,經常幫她執漏。雖然他們都甚理性,鮮有摩擦,但原來兩人都有死穴,幾次鬧交都是因太肚餓引起!
藝人雨僑今年3月跟拍拖7年的歌手羅力威拉埋天窗,她受訪時直言婚後更開心,在一些細微處發掘到雙方優點。講到若有摩擦,他倆亦有一套解決方法:「好多人相處都係『以痛制痛』,即係如果你再咁咁,我就咁咁,但我們覺得唔Work,唔應該互相威脅,我們會直接講點會開心一點,好多時人係即刻發脾氣,或叫對方戒做乜乜,這樣會令自己唔開心,我們會坦白講,都好理性,比較少出現問題。」
老公幫執漏
不過,兩人亦有吵架時候,原因竟然是:「咁多年只係吵過四、五次交,都因為我們不可以肚餓!記得大半年前我們上律師樓搞文件,又要趕試姊妹裙,又漏低東西,我們都好肚餓,於是沖昏晒頭腦,就好煩究竟先做什麼,不過間中有少少鬧交都係情趣。」
雨僑又大讚老公是細心暖男,經常幫她執漏:「我旅行有無數次漏電話、耳塞、手袋,佢救番好多次,之前婚前輔導做測驗,才知道他嚴謹方面係超高分。」問到生小朋友的計劃,她指最需要準備的並非金錢:「我覺得要先做到身教,自己要做好榜樣,呢樣係做父母要學習的事。」
網紅收入勁
曾唱歌和拍戲的她,另一最為人熟悉的身份是YouTuber,在現今網紅活躍的時代,她當然有大量KOL工作,直言佔收入的95%,雖然收入甚豐,但仍然選擇繼續做藝人:「做藝人令我可以有唔同閱歷,例如去南非拍節目、美國登台,見識多點,寫東西都豐富一點。」
|